CONSELLERÍA DE MEDIO AMBIENTE

Medio ambiente abre dous expedientes contra Ferroatlántica, que podería ser multada con 600.000 € polo baleirado do encoro do Xallas. (GZnación/Redacción/16 Nov 07).

A apertura de dous expedientes sancionadores e a posibilidade dunha multa económica son as accións que ven de presentar a Consellería de Medio Ambiente contra Ferroatlántica, empresa encargada de xestionar o encoro do Xallas, e responsabél da morte de milleiros de peixes a pasada semana.
Así o comunicou o titular desta consellería, Manuel Vázquez, en rolda de prensa, quen cualificou de "pésima" a xestión que esta empresa estaba a desenvolver no encoro, cuxa mala administración é para o conselleiro única en galiza, xa que "no resto dos encoros galegos non se están a producir problemas nos ecosistemas fluviais".
Un dos dous expedientes foi aberto pola Dirección xeral de Conservación da Natureza, que conlevaría unha sanción moi grave por incumplimento da Lei de Pesca Fluvial de Galiza. Este tipo de infracción suporía unha multa de entre 60.000 e 300.000 euros. O segundo, aberto por Augas de Galiza pola mala xestión do encoro e a realización de obras no mesmo sen dispor dos permisos pertinentes.
Unha catástrofe por desobediencia
Respecto ao sucedido no río Xallas entre o 9 e o 10 de novembro, o conselleiro de Medio Ambiente salientou que un día antes de que se producise o baleirado, axentes de conservación da natureza advertiron ao operador do encoro da Fervenza que debían reducir o caudal ecolóxico ante o baixo nivel que presentaba o embalse; un aviso do que a empresa fixo caso omiso.
Estes mesmos axentes constataron tamén que se estaban a facer obras sen permiso dentro do embalse, cando xa fora baleirado.